Tuman hokimi tegishli o‘rinbosar va masʼullar, tashkilotlar rahbarlari, shu kabi M-37 yo‘li atrofida joylashgan mahallalar “beshligi” hamrohligida maxsus avtobusda xalqaro yo‘lning Kattaqo‘rg‘on tumanidan Paxtachi tumanigacha bo‘lgan masofasida amalga oshirilayotgan obodonlashtirish ishlarni ko‘zdan kechirdi. 

Shu kunlarda hashar yo‘li bilan mahallalarning ichki yo‘llarini taʼmirlash ishlari jadal surʼatda amalga oshirilmoqda. Qishloqlardagi tuproq ko‘chalarga tosh yotqizishda mahalla faollari, oqsoqollar ham bosh-qosh bo‘lishyapti.

Tuman rahbarlari joylarda fuqarolar uchun sayyor qabullar o‘tkazishmoqda.

Bir vaqtning o‘zida tuman hokimi Xalq qabulxonasi mudiri hamrohligida Islomobod mahallasida fuqarolarni qabul qilgan bo‘lsa, tuman prokurori va DSI boshlig‘i Xalqobod mahallasi aholining murojaatlarini o‘rgandi.

Tepa mahallasi hududidagi Oromgoh kichik sanoat zonasida bir qator ishlab chiqarish korxonalari faoliyat yuritmoqda.

Tuman hokimi o‘rinbosari Sherali Aliyev bu yerdagi tadbirkor bilan uchrashib, ularning muammolarini o‘rgandi.

Faoliyati namunali yo‘lga qo‘yilgan umumtaʼlim maktablari targ‘ibotchilarining ish tajribasini ommalashtirish, ular mehnatini munosib rag‘batlantirish maqsadida “Ijodiy-madaniy masalalar bo‘yicha eng faol targ‘ibotchi” Respublika tanlovining tuman bosqichi o‘tkazildi.