KUYDIRGI KASALLIGIDAN EHTIYOT BO‘LING!

KUYDIRGI KASALLIGIDAN EHTIYOT BO‘LING!

Kuydirgi – bu hayvonlar va odamlar uchun o‘ta xavfli yuqumli kasallik hisoblandi. Chorvachilik rivojlangan hududlarda ko‘p uchraydigan bu kasallik asosan, kuydirgiga chalingan hayvonlarni so‘yish, terisini shilish, go‘shtini maydalash, tashish va oshqozon-ichaklari hamda kalla-pochalarini tozalash jarayonlari bilan bog‘liq.

Kuydirgi aksariyat hollarda teri shaklida (98,0 – 99,0 foiz) uchraydi va kasallikning bu turida bemor to‘liq tibbiy davo muolajalaridan so‘ng hech qanday asoratsiz sog‘ayib ketadi.

Kasallikning septik, ichak, o‘pka shakllari juda og‘ir kechadi va odatda o‘lim bilan tugaydi.

“Teri yarasi” shaklidagi yara boshqa yaralardan tubdan farq qiladi:

yaraning og‘riqsiz bo‘lishi (agar ikkilamchi infeksiya qo‘shilmagan bo‘lsa);

yara ustini ko‘mirga o‘xshash qora po‘stloq qoplashi;

yara atrofi qizarib, shish paydo bo‘lishi;

baʼzida yaraga yaqin joylashgan limfa tugunlari yallig‘lanib, kattalashishi kuzatiladi (limfadenit).

Shuningdek, yara atrofida pufaksimon toshmalar paydo bo‘lishi ham mumkin. Kuydirgi yarasi asosan badanning ochiq qismlari(qo‘l, oyoq, yuz, bo‘yin)da ko‘proq uchraydi.

Bunday holatlarda zudlik bilan tibbiyot xodimlariga murojaat qilish zarur. Ayrim holatlarda bemorlar yaraning ustidagi qora po‘stloqni o‘tkir tig‘li jismlar yordamida olib tashlashga urinishadi. Natijada kasallikning teri shakli septik shakliga o‘tishi bu esa og‘ir holatni yuzaga keltirishi mumkin.

Shu sababli, badanda yara paydo bo‘lsa va bu yaraning paydo bo‘lishi kasallangan mollarni so‘yish, terisini shilish, go‘shtini maydalash, oshqozon-ichaklarini hamda kalla-pochasini tozalash bilan bevosita bog‘liq deb hisoblansa, zudlik bilan hududiy davolash-profilaktika muassasalariga murojaat qilish kerak.
___________

КУЙДИРГИ КАСАЛЛИГИДАН ЭҲТИЁТ БЎЛИНГ!

Куйдирги – бу ҳайвонлар ва одамлар учун ўта хавфли юқумли касаллик ҳисобланди. Чорвачилик ривожланган ҳудудларда кўп учрайдиган бу касаллик асосан, куйдиргига чалинган ҳайвонларни сўйиш, терисини шилиш, гўштини майдалаш, ташиш ва ошқозон-ичаклари ҳамда калла-почаларини тозалаш жараёнлари билан боғлиқ.

Куйдирги аксарият ҳолларда тери шаклида (98,0 – 99,0 фоиз) учрайди ва касалликнинг бу турида бемор тўлиқ тиббий даво муолажаларидан сўнг ҳеч қандай асоратсиз соғайиб кетади.

Касалликнинг септик, ичак, ўпка шакллари жуда оғир кечади ва одатда ўлим билан тугайди.

“Тери яраси” шаклидаги яра бошқа яралардан тубдан фарқ қилади:

яранинг оғриқсиз бўлиши (агар иккиламчи инфекция қўшилмаган бўлса);

яра устини кўмирга ўхшаш қора пўстлоқ қоплаши;

яра атрофи қизариб, шиш пайдо бўлиши;

баъзида ярага яқин жойлашган лимфа тугунлари яллиғланиб, катталашиши кузатилади (лимфаденит).

Шунингдек, яра атрофида пуфаксимон тошмалар пайдо бўлиши ҳам мумкин. Куйдирги яраси асосан баданнинг очиқ қисмлари(қўл, оёқ, юз, бўйин)да кўпроқ учрайди.

Бундай ҳолатларда зудлик билан тиббиёт ходимларига мурожаат қилиш зарур. Айрим ҳолатларда беморлар яранинг устидаги қора пўстлоқни ўткир тиғли жисмлар ёрдамида олиб ташлашга уринишади. Натижада касалликнинг тери шакли септик шаклига ўтиши бу эса оғир ҳолатни юзага келтириши мумкин.

Шу сабабли, баданда яра пайдо бўлса ва бу яранинг пайдо бўлиши касалланган молларни сўйиш, терисини шилиш, гўштини майдалаш, ошқозон-ичакларини ҳамда калла-почасини тозалаш билан бевосита боғлиқ деб ҳисобланса, зудлик билан ҳудудий даволаш-профилактика муассасаларига мурожаат қилиш керак.