2018 йил 26 ноябрдан 29 декабргача Республика миқёсида "Патронаж ойлиги" ўтказилмоқда. Шу муносабат билан туманда патронаж ҳамшираси, умумий амалиёт шифокори ва тор мутахассислар иштирокида хонадонларда мақсадли патронаж тадбирлари ташкил этилмоқда. Унда патронаж парваришга муҳтож ёлғиз қариялар, ногиронлар ва ўзгалар парваришига муҳтож шахслар, 1 ёшгача ва ногирон болалар, ҳомиладорлар, янги туққан оналарга патронаж хизмати кўрсатилмоқда.

Туманда “Ватан - муқаддас, уни ҳимоя қилиш шарафли бурчдир!” деган умумий ғоя остида Нарпай тумани умумтаълим мактаблари ва касб-ҳунар коллежларида 2018 йил 15 декабрдан 2019 йил 15 январгача “Ватанпарварлик ойлиги” муносабати билан тадбирлар бўлиб ўтди. Тадбирда туман ҳокимлиги, туман Мудофаа ишлари бўлими, Ёшлар иттифоқи ва тумандаги нафақадаги ҳарбий хизматчилар иштирок этишди.

Ўзбекистон Республикаси Президентининг 2018 йил 24 апрелдаги "2017 — 2021 йилларда кўп хонадонли уй-жой фондини сақлаш ва ундан фойдаланиш тизимини янада такомиллаштириш чора-тадбирлари тўғрисида"ги ПҚ-2922-сонли қарорига асосан туманда мавжуд кўп қаватли уй-жойлар тижорат банкларининг имтиёзли кредитлари асосида таъмирланмоқда.

Нарпай туманида спортнинг Мини футбол тури бўйича бир ой вақт давомида 30 дан ортиқ тумандаги ташкилотлар жамоалари иштирокида "Ҳоким кубоги - 2018" спорт мусобақасининг финал учрашуви ўтказилди ҳамда  мусобақада туман ички ишлар бўлимига қарашли қўриқлаш бўлими биринчи ўринни эгаллади. Совриндорларга кубок, медаллар ва эсдалик совғалари топширилди.

Нарпай туманида 2018 йил 14 декабр куни ҳудудлардаги ижтимоий-иқтисодий аҳволни ва аҳолини қийнаб келаётган муаммоларни ўрганиш бўйича Республика ишчи гуруҳи томонидан туманда ўтказилган ўрганиш натижалари муҳокамасига бағишланган халқ депутатлари Нарпай тумани Кенгашининг қирқ еттинчи сессияси бўлиб ўтди.